ازاي تتكلم وتظبط نغمة صوتك
زي ما قلت في آخر مقالة "إزاي تبدأ تتعلم التظبيط" أن الحوار عبارة عن 60 % لغة جسم و 30 % الصوت و نغمته و طريقة إخراجه و الباقي 10 % هو الكلام , طبعا محدش لسه عارف موضوع الصوت ده مهم إزاي لأن معظم الناس ما بتفكرش أصلاً في الحوار و مش واعيين بأي حاجة بيقولوها أوي إلا قلة طبعاً .......
و عشان تتخيلوا الموقف معايا دلوقتي , تخيل مثلاً أن والدتك بتندهلك عادي , صوتها هيبقي طبيعي مش عالي أوي , طب لو أنت عامل حاجة غلط هتلاحظ اساسي تغير في نبرة صوتها و هتقلق منها لولا أنها قالت نفس الكلمة , طب لو هي مخنوقة منك أوي هتقولها إزاي , طب لو بتهزر .........الخ الخ .
أعتقد أنكم فهمتم قصدي ازاي كلمة واحدة ممكن يبقي ليها معاني كتير بمجرد ما تغير صوتك , لأننا ممكن نقولوكوا كلام جامد جامد جداً و مجربينوا كمان , و في الآخر ما تعرفوش تقولوه بطريقة صح فرد الفعل يكون مختلف تماماً .
ممكن تحاول تحكي مثلاً عن نفسك أنك عملت و سويت بس بطريقة بتبين أنك مش واثق من نفسك أو مذبذب شوية لولا إن الكلام جامد أوي , و البنت علطول تبدأ تعاملك بطريقة مختلفة كأنك بتكدب عليها و الصورة اللي أنت بتحاول تمثلها مش لايقة عليك و علي شخصيتك ذي ما هو واضح من طريقتك في الكلام .
و البنات أساساً أساتذة في كده , في دقيقتين ممكن تعرف لو أنت طريقتك في الكلام لايقة علي شخصيتك و علي مظهرك و لا مجرد تمثيل .
طبعا في ناس هتقول أنك ما تقدرش تغير في صوتك و تخليه أحسن لأنها حاجة أنت مولود بيها و متقدرش تغيرها و الكلام اللي مالوش لزمة في حاجة غير أنه بيخليك تشك أكتر .
لكن بالعكس دي في حتي كورسات تدريب كتيرة و حتي المغنيين بياخدوها عشان يحسنوا صوتهم .
و أنا و ناس كتير الدليل علي كده , أنا مثلاً صوتي مثلاً ما كانش عالي أوي و مكنتش بعرف أظبطه في الكلام و الحمد لله دلوقتي مع التدريب بقي أحسن بمراحل و فرق كتير أوي في كل حواراتي مع الناس .
طب إزاي تظبط الموضوع ده ؟؟؟
أهم حاجة في الأول أنك تعرف هو الصوت المثالي عامل إزاي و تبدأ تدرب صوتك عشان يطلع بنفس الطريقة .
الصوت المثالي بيكون الصوت العميق اللي ليه نغمة و واضح و متوسط في قوته , يعني ولا عالي أوي ولا واطي .