الثلاثاء، 18 أكتوبر، 2011

غلطه بتقتل التظبيط ( للرجال فقط )




ازيكم يا شباب , الجزء ده فيه حاجات كتيرة مهمة و كلنا بنغلط فيها(حتي أنا ساعات) , و يا ريت يا شباب الناس اللي بتعرف أو ما بتعرفش تظبط تحط ده كأساس , لأن الأسس دي من غير أي فن هتخليك تظبط البنت , و ده معناها أنك لو عارف حاجات زيادة هتبقي فرصتك كبيرة , المقالة دي طويلة شوية , بس ماقدرش أقول مفيدة قد أيه و غيرت في ناس كتير ازاي .




1) بتحلق لصحابك أو أنتيمك عشان البنت .

معناها : أنك بتحاول جامد أوي أنك تظبطها , أنت عرفت صاحبك من وقت طويل و أنت لسه مقابلها و مديها أنتباه أكتر , صباح كيس الجوافة ؟؟!! .

2)مديها أنتباه جامد أوي لدرجة أنها أي حاجة ما تسمعهاش تقولها "أنت قلتي أيه" قبل ما تبقي في مرحلة عميقة في العلاقة (يعني في الأول بالذات) .

معناها : مديها اهتمام بزيادة في كلامها و طبعاً بيها أوي ,لو هي بتتكلم و أنت مش سامع حاجة منها ماتقولش "ايه" و الكلام ده , أفتح موضوع جديد خالص و مش عارف أقول ده مهم قد أيه , لو أنت قلت كده و أنت لسه متعرف يبقي هتحلقلك وش (قدام مفيش مشكلة لأنها هيكون معناها أنك مهتم بيها و دي حاجة كويسة) , لو أنت فتحت موضوع جديد هتعمل حاجتين جامدين :
أ)مش هتبقي مهتم بيها أوي .
ب)هتبقي برنس عشان أنت مش مهتم بالعبط اللي بتقوله و ده كده كده هيساعدك .

3)بتجاوب عن الأسئلة بوضوح زيادة أوي أو منطقي أوي كأنك بتفكر كتير أوي في الأجابة قبل ما تقولها .

معناها : خايف أن اللي قدامك ما يقبلكش الا لو أنت أقنعته كويس . يعني مثلاً :
بنت:أشمعني بتسأل السؤال ده ؟؟
الغلط:عشان بقالي كتير بفكر في الموضوع ده و مش عارف.
الصح:عادي بأتكلم (و بص عليها وأسكت خالص لغاية لما تتكلم) .

الأخيرة بتبين أن مش هتأهل نفسك ليها و مش هتدافع عن نفسك لأنها لو مش عاجبها يبقي يلا باي .

4)بتقول كلام بالعبيط مالوش لزمة لولا أنهم ممكن يتقالوا في كلمة واحدة .

معناها :بتأهل نفسك , كل ما الكلام ما يبقي أقصر كل لما هيبقي أعمق في اللي قدامك , ما تكتبش اللي ممكن تقوله, و لو تقدر تبين الحاجة من غير ما تقولها يبقي أحسن بكتير كمان , ليه؟؟ لأنك مش بتاهل نفسك .
5)جريء لكن مش واثق في نفسك .

معناها : حاسس جواك أنك مش هتعرف تظبطها,فبتحاول تعوض عن كده بحركات عمرها ما هتوصلك لحاجة , نفس نظام الشباب اللي بيعدوا يقولوا كلام مش محترم للبنات و كلام أهبل نظام و النبي نمرة تليفونك أو "أنت مزة جامدة أوي" , و كل الكلام اللى مالوش لزمة ذي دول , أو انك تدخل علي واحدة بطريقة متخلفة بتشد الأنتباه و خلاص , لو أنت واثق في نفسك مش هتعمل الحاجات دي .

6) أنك تحس بفقدان الأمان و تحاول تعوضه بزيادة .

معناها: خايف أنك ما تتقبلش من الناس,عمرك شفت بواب أو بتاع خضار قاعد يتكلم عن الفلوس و أنه هبل أن الواحد يشتغل في البيزنس و الحوارات دي , كأنك مثلاً في كلية تجارة و واحد واقف معاك في طب و ييجي يقولك أنت كليه أيه , تقوله "أصلي بصراحة بأتخنق من الكليات العلمية كلها حفظ و آخرتها مالهاش شغل الخ الخ , و بعد كده تروح قايل أنك تجارة , بتدافع عن نفسك ليه الا لو أنت مقلق و مش واثق في نفسك , نفس الكلا م الشباب اللي فرحانة أوي بنفسها نظام "أنا حمادة و أنا سباك هيهههه " فاكرين أنهم كده مغرورين و ده هيخلي شكلهم جامد و ده غلط برضه و بيبين أنك مش واثق في نفسك ولا مستريح في جلدك .
يعني مثلاً في واحد صاحبي في بنات قالتله "أنت بيبي فايس" , طبعاً الصح تقولهم آه أنا لاحظت كده برضه أنتوا فعلاً كبار عليا أوي(بهزار) , لكن هو كان بيروح يقولهم "طب هي دي حاجة وحشة" نظام تروح تقول بنت أنت بتحب تتكلمي مع رجل أقرع لول كأنك مغرور لكن الواضح أنك جريء بس .

7)محاولة تعويض الفشل في أي حاجة .

معناها : خايف أن حد يخنق عليك أو يقول عليك أنك فاشل لو أنت فشلت قدامه في أي حاجة ذي التظبيط أو في اللبس و في أمتحان .
عمرك ما تقول الكلام الأهبل نظام "أصلي أنا تعبان أوي و مطبق بقالي يومين" لو أنت هتموت ما تقلش كده , لأن أول لما تفكر في الموضوع ده يبقي أنت بتأهل نفسك لأي حد , لو أنت لابس لبس ضايع ما تقولش للي قدامك أنا عندي لبس جامد في البيت, من الآخر ما تجيبش سيرة خالص عن الموضوع .

8)ترجع تاني لمراحل التظبيط الأولانية .

معناها : أنك نفسك فيها أوي و مهتم بيها جداً , في البداية البنت بتحب تختبر الولد في البداية عشان تشوف هو راجل ولا عبارة عن أيه بالظبط و طبعاً الصح أنك بتعدي الأختبارات بطريقة المغرور خفيف الدم و بعدها بتبدأ تدخل في بناء الراحة بأنك بتشيل الغرور و تبدأ تدخلها في دنيتك و تقولها شوية أسرار عنك عشان تثق فيك و تهزر معاها و تبقي لعبي , لو أنت دلوقتي رجعت لمرحلة الغرور و التريقة تاني و هي عرفت عنك أنك خلاص جامد , هتقول عليك أنك مغرور و وقح و هتقول كفاية كده منه , و الحل أنك تبقي لذيذ معاها و لو عملت حاجة أو أتريقت عليك بص الناحية التانية عشان تعتذرلك , لكن لو أنت أتريقت عليها تاني يبقي هتبوظ الحوار ,ده ممكن يوضح ليه كان فيه حوارات بتفكس أول لما بتزود في الهزار .

9)أنك تستناها لو هي سابتك لأي سبب ذي "أنا رايحة الكافتريا أجيب حاجة أستانني هنا " .

معناها : معجب بيها أوي و عايز تكلمها لدرجة أنك مش عايز تكلم أي حد فمستنيها , أحسن حاجة تعملها أنك تروح تكلم أي حد تاني عقبال لما تيجي(يفضل يبقوا بنات ده هيوضح أنك جامد و مش محتاجها أصلاً و يمكن يعمل غيرة كمان ) .

10) أنك تفتكر معظم تفاصيل الحوارات اللي أتكلمت فيها مع البنت (بس مش غلط في مرحلة بناء الثقة و الحب بالعكس ده مهم تفتكر هي بتحب و عايزة أيه ) .

معناها : الموضوع بالنسبة لك كبير أوي, عشان الشخص ليه أهمية كبيرة عندك (مثلاً مزة جامدة) , بس طبعاً ده مش معناه أنك تبقي وقح ,يعني لو كان في كلام واحد أو بنت تخينة قالته مش هتديله أهمية كبيرة و هتنساه , أعمل نفس الكلام مع البنت الجامدة , لو في كلام أي واحد قاله ممكن تفتكره مفيش مشكلة ,لو كان الحوار عاطفي أوي مع البنت يبقي مفيش مشكلة برضه ,لكن لو غير كده أعمل نفسك مش فاكر حاجة , يعني لو كنت بتكلم موديل و فاكر كل كلمة قالتها,أعمل نفسك مش فاكر أسمها , لو أنت في بنت عارفها من أي حتة بس أنت عمرك ما كلمتها , كلمها ذي أي بنت عادية و ما تغريش نفسك بأنك تقولها أحنا شغالين مع بعض أو في نفس الفصل , لو خنقت ساعتها ممكن تقولها كده , لكن لو ما حصلش كده تصور هيكون أيه احساسها لما تيجي تشوفها تاني مرة كأنها صدفة .

11) أنك تقولها حاجات كتيرة عن نفسك بدري أوي .

معناها : أنك عايزها تعجب بيك نظام الشباب اللي بتتمنظر , و ده معناها أنك مهتم بيها أوي .

و الموضوع ليه كذا تصنيف :

أ)كلامي: لو أنت قلت لبنت " آيوه أنا لسه راجع من دبى"(أو أي مكان ممكن يشد أنتباه أي حد) أو"آيوه أنا لسه مصلح ساعتي الرولكس" أو "أنا أمبارح لسه جايب عربية بس معجبيتنيش..." , و بعد كده هتوصل للفكرة أنك بتحاول تخليها تعجب بيك مووووت...نفس الكلام برضه أنك تعد تقول أسماء "كنت لسه أمبارح مع صاحبي محمد ابن الجوهري و كنا.." , ما تديش للبنات قصة حياتك من أولها , القصص اللي بتوضح حاجات عن شخصيتك لازم توضحها بطريقة غير مباشرة عشان تخليها جامدة موت لدرجة أنها ممكن تتقال بالتفصيل , و يبقي فيها حاجات موجودة فيك, ما تقولش تفاصيل مالهاش لزمة, قول المهم , ده هيبين أنك مش بتحاول تأهل نفسك ,"خير الكلام ما قل و دل" .

ب)ترفيهي: لو أنت عارف حاجات ذي قراءة الكف,المكعب أو صور روشة , الكلام ده بيبين أنك بتحاول بكل قوتك و ده غلط كبير , خلي الحاجات اللذيذة دي قدام شوية أو تكون سبب أنك تكلمها لوحدها"أنا هاخدها منكم لحظة أحنا قاعدين هناك" و بعد كده "أنا هاوريكي حاجة هتعجبك موت " و بعد لما تعدوا متتكلمش لغاية ما هي تتكلم .

***ج)أنك تحاول تعمل صلة و أتصال مع أي واحدة من غير ما هي تكسبك عشان تستحق كده .

معناها : صباح العبط , تلت تربع الناس بتعمل كده و بصراحة صباح الأعاقة بتخليك خروف فحت نظام "حلوة أوي السلسلة دي" أو "أنت أسمك أيه" أو "ممكن نتعرف" , صباح أن مفيش حد ما شفتوش ما مبيعملش الهبل ده , و أنت ليه عايز تعرف المعلومات دي عن واحد متعرفوش ؟؟؟؟ أي حد هيقولي أن أنت مش مخبي رغباتك و أنها المفروض تبقي فرحانة أنك داخل عليها و بتقولها كده , الكلام ده ممكن يبقي حقيقي في تظبيط الأنترنت أكتر , لأن الموضوع بيديك البرواز أنك شاب نايس و دي من الحاجات اللي البنت بتكرهها لأنها بتحب الرجل المسيطر بس مش عنيف , الكلام ده ما ينفعش مع البنات الجامدة (أكتر من  8.5من في الجمال) مهما كنت شكلك وسيم أو عندك صيت , لكن لو بنات أقل من كده في الجمال ممكن تنفع معاها عادي عشان هما أصلاً مش متعودين علي كده من الولاد .

وعشان أديكم مثل , أتفرجتم علي فيلم ويجا , فاكرين هاني سلامة كان متعنتز ازاي ودخل علي دوللي شاهين :

أولاً كان مايل نحيتها و دي غلطة كبيرة يعني لولا أنه مشهور و هي بالنسبة له مهمة فمايل نحيتها , ثانيا فضل واقفلها و مبرقلها شوية حتي هي أستغربت هو في أيه :
دوللي: واتس رونج ؟
هاني: ناثنج
دوللي:أمال في أيه ؟
هاني :أنت بتتكلمي عربي طب كويس أوي أنا أسمي هاني (و بيبتسم و دي من الحاجات اللي ممكن تفرق كتير لأن 97% من البنات بتقول انها تحب الرجل يدخل عليها مبتسم) .
(تصور أنك بنت و واحد جاي يقولك أنا أسمي حمادة و كمان لسه مفيش أنجذاب و كمان هو مش مشهور هيكون أيه رد فعلك بالذات لو في ناس كتير بتعمل كده ) .
دوللي:عارفة ممثل (بقرف)
هاني بثقة) و أنت ؟
دوللي:أنا ايه ؟
هاني: أسمك ؟
دوللي:ليه ؟
هاني : (بثقة) يعني , نتعرف .
دوللي:للأسف أنا عايزة آخد حمام شمس و ماليش مزاج أتعرف علي حد دلوقتي (و أديتله ظهرها و دي علامة عدم أعجاب كبيرة )

الطريقة اللي دخل بيها هاني كانت مباشرة و هو واثق من نفسه و بيبتسم و داخل دخلة صح , لكن هو غلط في أنه مخلي جسمه كله أتجاهها و كمان مايل نحيتها و سألها أسئلة بتبين أنه مهتم بيها و في كام واحد عمل كده قبله في رأيكم , الصح أنك تدخل جنبك أتجاهها(كأنك ماشي بعد لما خدت الكورة) و وشك ناحيتها من غير ما تميل خالص و أتكلم .

طبعاً كلكم هتقولوا طب ازاي هو جابها بعد كده , فاكرين البنات التلاتة الجامدين اللي كانوا بيتصوروا مع هاني و فرحانين أوي و بعد كده مشيوا , ده عنصر كبير جداً من عناصر الأنجذاب , أول لما بنت تشوفك مع بنت تانية بيبقي واضح جداً أنك مظبط حتي لو أختك هما ما يعرفوش, البنات برضه هتديك علامات أعجاب كتيرة سواء بالنظرات أو أنها تيجي تكلمك عن أي حاجة و تعمل عبيطة , و واضح جداً أن ده خلاها تنجذب ليه جامد أوي بس هو كان جامد و تقل عليها و بعد كده كان مسيطر بأنه بصباع واحد قالها تعالي عايزة أيه و أبتسم, و طبعاً ده شدها ليه أكتر . .

د)أنك تعد تتكلم دون رد فعل من الشخص اللي قدامك .

معناها : أول لما تيجي تتكلم مع واحدة و هما ما يردوش , و أنت تكمل كلام برضه , بتخلي نفسك أوطي منها و بتنزل في قيمتك جامد , و طبعاً بتحس بعدم الأمان و الفشل لأنك بتحاول تأهل نفسك فتحاول تعوض ده بأنك تتكلم يمكن أكتر كمان , و بعد كده تحس أنك بقت قيمتك واطية أوي عشان أنت آهلت نفسك ليها, فهتحاول تقول أي حاجة عشان يمكن في حاجة تعجبها .
أنت ممكن ما يحصلكش الكلام ده كله بأنك ما تتكلمش كتير الا لما يردوا , أنت ممكن تعمل كده بأنك تسكت و تبصلهم و بكده هتجبرهم يملوا الفراغات اللي مش لذيذة في الحوار (أي بنت ما بتحبش تحس أنها السبب في فشل أي علاقة , تصور لو أنت قلتلها أنت شكلك غريبة شوية ؟؟؟؟ )

الكلام ده يا شباب كله عن تجربة و لازم تقروا المقالة دي كتير عشان تتطبقوها في حياتكم علطول , مع القراية هتلاقي نفسك بدأت تلاحظ أن كل الكلام ده بيحصل و هتعرف مين اللي خروف من الجامد , و هتبدوأ تطبقوها لوحدكم في كل كلامكم , لو تقدر تطبعها و تحطها في جيبك و تقراها كل شوية في أي مكان هتأثر كتير .