الاهمية القصوي للاتصال بالعيون ( خاص للرجال فقط )

الاهمية القصوي للاتصال بالعيون ( خاص للرجال فقط )

الأهمية القصوي للنظرات و ازاي أنها بتفرق بمراحل في التظبيط , و هي دي اللي بتبين بجد أنت واثق في نفسك و لا لا , و فعلاً هو ده اللي بيعرف الناس انك جريء و واثق في نفسك بجد .

و بصراحة انا لازم أعترف , في البداية أنا ما كنتش جامد خالص , كان ليا آه صدف باعمل فيها حاجات صح , بس كان ليا غلطات ما تتعدش , و من الغلطات الكبيرة فحت هي الأتصال بالعيون .

و مع الوقت أكتشفت أني مش أنا بس اللي واقع في المشكلة دي لكن تلت تربع الشباب واقعين في نفس المشكلة , معظم الناس ما بتقدرش تفضل باصة شوية في عنين الغرباء و معظم الوقت بيبصوا لتحت(علامة الاستسلام يعني مش واثق في نفسك) و يمكن كمان بينزلوا رقبتهم اتحت و بيبصوا عالجزمة , و ده يا شباب بيسموه عدم ثقة بالنفس واضحة جداً , لولا أننا مانعرفش كده لكن البنات بتحس بالموضوع ده من غير مجهود مجرد أحساس .

و طبعاً عشان أنا كنت واقع في المشكلة دي كان لازم الاقي حل ليها عشان أكتشفت أنها بتفرق كتير لأن الثقة بتبان في 3 حاجات :

1)لغة الجسم و نظرات العيون القوية المسيطرة .

2)نغمة الصوت اللي ليها نغمة و قوية و معبرة .

3) طبعاً الكلام .

و من هنا بدأت أدور شوية و أجرب بنفسي عشان أعرف رد فعل الناس لموضوع العيون ده .

و لازم أعترف يا شباب أن الموضوع لو مظبطوش البنت ممكن تشوفك علي حقيقتك و تحس بعدم ثقتك و يتدمر كل اللي عملته عشان البنات حساسة جداً .

أولاً كان لازم أشوف رأي واحدة جامدة و جميلة في الموضوع و أهميته , و مكنتش متوقع هو مهم قد أيه , البنت دي كانت واثقة في نفسها جداً , و كانت بتقول أنها بتحب النظرات العميقة أو الحميمية جداً بالذات اللي ممكن تفضل وقت طويل, يعني مثلاً 3 دقايق (بس طبعاً مش متواصل يعني تقطع أول لما هي تقطع وبعد كده تكمل تاني) , و قالت أنها ممكن تحس بانجذاب جامد ناحية اللي بيبصلها و ممكن تكلمه كمان وتبقي ودية أوي معاه .

طب كلام جميل , بس طبعاً مش كفاية , يعني المفروض تبص أزاي , تبرق لها و لا براحة , طب تبص عالعينين و لا عين واحدة و لا أيه بالظبط , طب تطول قد أيه , و رد فعلها معناه أيه معجبة ولا هتجري ورايا بالبلغة, طب أنا ممكن أخليها هي اللي تيجي تظبطني بعيوني ؟؟؟

طبعاً كل دي أسئلة حيرتني و كان لازم الاقيلها حل لأني ذي ما البنت قالت , موضوع بيأثر كتير فيها و عبره ممكن يبقي في فرص كتير جداً قدام الواحد و تفرق كتير .

و الحمد لله لقيت حلول كتيرة و عرفت فعلاً أن الموضوع ده هيخليك برنس في التظبيط و هيجيبلك فرص لبكرة .

طبعاً الموضوع ده كبير جداً و عشان كده لازم أديكم أسس عشان تبنوا عليها .

أولاً لازم يبقي عندكم القدرة أنكم تفضلوا مركزين في عيون اللي قدامكم لمدة كبيرة .

مثل صغير عن قوة تاثير الموضوع , كل الناس أول لما باتكلم أول لما ببص في عيونها بتركز معايا أنا بس و من أهم الحاجات أنك تخليهم في اللحظة معاك .

أقولكم علي حاجة أجمد بمراحل , لو أنت أو هي فضلتم باصين في عيون بعض لمدة طويلة , المخ بيفرز هرمون الحب , أنتم الأتنين هتحسوا بالأنجذاب لبعض , و الكلام ده علمي بحت .

و طبعاً كان لازم أجربه عشان أطعم فضولي , شفت واحدة عمري ما ممكن أقع في حبها , دكتورة بتدينا محاضرات هههههههه , رحت كلمتها عادي , طبعاً هتسالوني الدكتورة أيه نظامها , مش وحشة بس عنيها جميلة و لسه متحولة من معيدة لدكتورة , المهم رحت أكلمها كده في حوار فاشل عن السكشن , و فضلت مركز في عنيها من غير ما أشيلها خالص لوقت طويل , أستغربت لأن لولا أن الدكتورة دي عصبية لقيتها بتتكلم عادي خالص و مش قادرة تفضل باصة لوقت طويل , بس كانت مركزة معايا جامد أوي .

فا بعد لما سبتها و مشيت , حسيت باحساس غريب , حسيت بانجذاب ليها و كنت بافكر في عنيها , طبعاً أنت كنت مستغرب جداً عشان أنا عمري ما استظرفت الدكتورة دي , و طبعاً ده وصلني لحاجة , تصور لو الموضوع ده بياثر فينا أحنا الرجالة كده , هيعمل أيه في البنات , و قد ايه ممكن يأثر في أي واحدة في البداية .

و طبعاً ما وقفتش عند هنا , بدأت أدرب نفسي أني أقدر أقعد وقت طويل جداً مركز في عيون الناس كلها , و لاحظت حاجات أول مرة أشوفها .

الناس اللي مش واثقة في نفسها ما بتقدرش تفضل باصة لمده طويلة في لحظة بيبصوا لأتجاه تاني , لكن الواثقين في نفسهم جامد , ممكن يفضلوا باصين وقت طويل جداً و يشوفوا رد فعلك .

طبعاً دلوقتي عشان تستفادوا بجد من الموضوع ده , هاديكم تدريب هيغيركم خالص ذي ما غيرني لأنها فعلاً في ناس كتير عندها المشكلة دي و أنا عارف قد أيه هتشكروني بعد لما تعملوه .

التدريب :

طول ما أنتم ماشيين في الشارع ,الكلية,الشغل...أي مكان , عايزكم تركزوا في عيون اللي قدامكم لغاية لما يبعدوا خالص عنكم و بعد كده أدخلوا عاللي بعده , يفضل لو يبقي بنات , ما تبرقوش جامد و مش لازم تتطولوا في الأول , أهم حاجة تشوفوا رد فعل عيون اللي قدامكم و تحاولوا تفتكروها .

يا ريت يا شباب تلاحظوا كويس رد فعل عيون الناس , و تكتبوا اللي شفتوه مع ملاحظاتكم و أسئلتكم , لأن الموضوع ده هيفيدنا كلنا , و هيفتح عيونكم لحاجات كتير, و هيفيدكم كتير , عشام أنتم مش عارفين هيكون في أيه في المقالة الجاية هههههههه .

الموضوع ده ممكن يفيدكم في أيه , أول حاجة هيزود ثقتكم في نفسكم جامد , هيخليكم فعلاً مركز أنتباه الناس , و هتعرفوا الفرص اللي بتضيع منكم قد أيه و ازاي تقدروا تستغلوها , و طبعاً ده مش هيفيدكم بس في التظبيط لكن في حياتكم كلها , قدام هنتكلم عن لغة العيون .