الجمعة، 7 أكتوبر، 2011

ازاي تبدا تتعلم تظبط البنات


عمرك جيت تكلم
بنت و لقيتها بتعاملك بطريقة مش كويسة مرة واحدة أو كانت في بنت معجبة بيك أوي و بعد كده قلشت منك من غير سبب معين لولا انك حسيت انك معملتش حاجة غلط , أو يمكن ساعات كنت حاسس أنك بتكلم في حيطة مش بتعلق كتير علي كلامك و تبدأ تلاقي نفسك بتفكر تفكير غبي :

"هو أنا فيا حاجة غلط ولا أيه" أو "أنا غبي فشخ ضيعتها خروف فعلاً" .

و تفضل في الموال ده كل مرة لدرجة أنك وصلت لمرحلة أنك هتقتل المزز من الخنقة .

طب و ايه الحل ؟؟؟






في ناس هتقولك خليك نفسك و عامل المزز ذي صحابك الولاد بالظبط , كلام جميل , بس هيجي واحد يقوللي أنا باحاول أكون نفسي أوي بس بأمعرفش أكمل معاهم حوار و واحد تاني يقولك باحس إن البت ما بتحبش تقف معايا كتير و يمكن بتحلقلي ساعات و آخر يقوللك بأحس كأني بجري وراهم و أنا اللي مهتم مش هي و بتعاملني كأني بيئة .

و نرجع تاني ندور علي حل للحل اللي شعب مصر كله هيقولهولك أول لما تدخل الجامعة أو لما تيجي تكلم أي مزة .

الحل الحقيقي فعلاً أنك تعرف الرجالة اللي  بتظبط صح بتعمل أيه عشان تتعلم منها و بعد لما تبقي فيك بالتعود هتلاقي نفسك بقيت طبيعي بتطلع كلام رجالة بجد .

و ذي ما أنتو فاكرين إن الكلام بس هو العامل الرئيسي في الحوار مع أي مزة , لكن بالعكس ده مجرد 10 % من الحوار بس , طبعا هتقولولي عند أم ترتر .

لكن الكلام ده فعلاً حقيقي , 60 % من الحوار لغة الجسم و 30 % نغمة صوتك , و ده كلام علمي مثبت و موجود في كتب كتير .

طب كل الكلام ده لازمتو أيه يعني هنعمل بأمه ايه ؟؟؟؟؟

لو أنت عرفت  تظبط  90 % من مهارات الحوار اللي هي اللغة الجسدية و الصوت عشان تبين أنك رجل و تبين أنك قيمتك عالية و مظبط يبقي معظم الحوار مع البنات هيبقي أسهل بمراحل و هتلاقيهم بيعاملوك بطريقة مختلفة خالص و ساعتها كل الكلام هيبقي تأثيره قوي جداً و هتظهر واثق في نفسك و دي من اهم الحاجات , لأن البنت بتموت في الرجل اللي عارف هو عايز و واثق من نفسه .

و علي فكرة البنات بطبيعتها بتفهم اللغة الجسدية أكتر مننا بعشر مرات و ده معناه إنك ممكن تعمل حركة بجسمك تبين أنك مدلوق مثلاً و أنت طبعاً مش في دماغك خالص و هي مقروفة منك و عشان أنت مش فاهم , كل م البت تبعد عنك بدل ما تسيبها لأ تبوظها أكتر بانك تتدلق زيادة فتروح حلقالك خالص و أنت لسه مش فاهم حاجة برضه .

و الكلام ده باشوفه كتير أوي سواء في الكلية أو في حتت ذي ستي ستارز بسبب جهل معظم الرجالة بلغة الجسد و علي فكرة دا اللي بيفرق الخروف من الراجل

و طريقة لبسك و الستايل بتاعك مربوطين برضه بلغة جسمك عشان لبسك بيعبر عن مظهرك العام للناس و عن نضافتك و ذوقك , و كل لما يبقي منظرك أجمد كل لما لغة جسمك هتعبر عنك أكتر .

و عشان كده دايما أي كورس في 
التظبيط  لازم يتكلم الأول عن لغة الجسد والمظهر الخارجي اللي بيشمل الستايل و الجزمة و البرفان و النظافة , لأنك لازم تكون في أحسن شكل ليك , و بأحسن شكل مش معناه أنك تكون وسيم , لأن الشائع ان الناس فاكرة كده , لكن الموضوع ده فكسان خالص .

أهم حاجة تبقي نضيف من كل النواحي ذي الأسنان وريحة الفم (في مزة في انترفيو قالت أنه لو "براد بت" و ريحة بقه وحشة مش هتقف معاه حتي), و لبسك يبقي لايق علي بعضه و علي الجزمة (مهمة جداً) , و لو تقدر تخلي الحلاق يظبطلك شعرك و ذقنك يبقي قشطة كمان .

البنات عكس ما أنتو فاهمين بيلاحظوا التفاصيل اللي أحنا ما بنفكرش فيها خالص, يعني البنت ممكن تبص مثلا الحزام لايق علي الجزمة ولا لأ , أو الجزمة نضيفة ولا وسخة (بيعرفوا من كده أنت نضيف آد أيه ) ,طب أنت بتهتم بوشك ولا محبب , طب مناخيرك فيها شعر مقرف و لا مظبوطة , إلا لو أنت عايز تعرف مزة جربانة .

و عشان كده لازم أول حاجة تظبطها هي لبسك و مظهرك و بعد كده لغة جسمك و برضه صوتك مهم أوي , و بعد كده تبدأ التظبيط بالنسبة لك هيبقي سهل أوي , لأن قيمتك بقت عالية من مظهرك و باين أنك راجل بوضوح يبقى أساسي رد الفعل هيبقي أحسن و بكده هتزود فرصك كتير أوي .

تصور بقي العكس , دلوقتي أنت مزة جامدة و كل الولاد اللي مصدقوا بيبصوا عليك , و في واحد خروف ذقنه معفن و مش مظبوط و لبسه فلاحي و ناقص شوية و من كتر ما هو مايل نحيتك بريحة بقه ذي ريحة الفار الميت , و بيقول "هاي أنت جميلة أوي ممكن نتعرف و نبقي صحاب" و هو منشكح أوي , في رأيكو هتقولو أيه لأمثالو ,طب أنت شاب محترم و متعلم و نضيف و رحت كلمتها بنفس الطريقة , هيكون رد فعلها طبيعي مختلف و أحسن بكتير .

يا ريت تكونوا فهمتوا الفكرة , و مع التجربة هتلاقوا كل الكلام ده حقيقي , أسهل حاجة تروح تسأل أي واحدة علي الموضوع ده و هتأكدلك هما إزاي بيحبوا الواد الروش اللي بيهتم بمظهره و نضيف .